Sunday, 26 July, 2009

శాంతి అంటుకుంటుంది

వసంతంలో, విరిసిన కొమ్మ ఒకటి తన ప్రక్క కొమ్మతో- "ఈ రోజు అంతా బోసి పోయినట్లు, చాలా వెలితిగా ఉన్నది" అన్నది. రెండో కొమ్మ మొదటి దానితో ఏకీభవించింది-"అవును. ఈ రోజు అస్సలు బాగా లేదు. నిజంగానే అంతా ఖాళీగా, వెలితిగా ఉంది" అన్నది.

అప్పుడే, పిచ్చుక ఒకటి ఎగిరి వచ్చి, ఒక కొమ్మమీద వాలింది. అంతలోనే ఇంకో పిచ్చుక ఎగురుకుంటూ వచ్చి, ఆ ప్రక్క కొమ్మన కూర్చున్నది. వాటిలో ఒకటి కిచకిచలాడుతూ అన్నది- నా తోటి పిచ్చుక నన్ను వదిలిపెట్టి వెళ్ళిపోయింది" అని.

దానికి రెండో పిచ్చుక జవాబిచ్చింది- "నా జంటది కూడా నన్ను ఒంటరి దాన్ని చేసి వెళ్లిపోయింది. అది ఇక తిరిగిరాదు. అయితేనేమి, నాకు?" అని.

అప్పుడిక అవి రెండూ కిచకిచలాడుతూ, ఎగురుకుంటూ, తిట్టుకోవడం, కొట్టుకోవటం మొదలెట్టాయి.

అకస్మాత్తుగా ఆకాశం నుండి ఇంకో రెండు పిచ్చుకలు ఊడిపడ్డాయి. అవి నిశ్శబ్దంగా వచ్చి, కొట్టుకుంటున్న పిచ్చుకల పక్కనే కదలకుండా కూర్చున్నాయి. ఇక ప్రశాంతత వచ్చింది అక్కడికి. శాంతి ఏర్పడింది.

ఆపైన ఆ నాలుగూ రెండు జంటలుగా ఎగిరిపోయాయి.

అప్పుడు మొదటి కొమ్మ రెండో కొమ్మతో అన్నది - "అబ్బ! ఎంత గందరగోళపు శబ్దం!" అని. రెండో కొమ్మ జవాబిచ్చింది - "నువ్వు దానికి ఏ పేరు పెట్టినా సరే, ఇప్పుడు మాత్రం ప్రశాంతంగాను, విశాలంగానూ ఉన్నది. మరి , పైగాలి శాంతిస్తే, నాకనిపిస్తున్నది, క్రింద బ్రతికే వాళ్లుకూడా కొంత శాంతిని తెచ్చుకుంటారని. గాలిని కొంచెం గట్టిగా, నా దగ్గరికీ విసిరి పంపరాదూ?" అన్నది.

"ఓహ్, తప్పకుండా. శాంతి కోసం, తప్పకుండా వీస్తాను. వసంతం అయిపోతే ఎలా మరి?" అంటూ మొదటికొమ్మ గాలిని బలంగా వీచుకుంటూ రెండో కొమ్మను కౌగిలించుకున్నది.

No comments:

Post a Comment

Creative Commons License
ద్రిమ్మరి by కొత్తపల్లి బృందం is licensed under a Creative Commons Attribution 2.5 India License